إزاى تطلع الـAds حاجة آخر ألاجا

قبل ما تبدأ قرايه الـArticle دى عاوزين نقولكوا حاجتين ..

اولاً الـArticle بتشرحلك الـFacebook Ads من اول طأ طأ .. ولحد السلام عليكم

ثانيًا الـArticle دى مناسبه لـيك لو انت معملتش Ads قبل كدة خالص ومتردد إنك تعمل واحد ..

او لو انت بتعمل Ads وحاسس إن فيه حاجة ناقصة أو غلط ..

(يعنى لو انت شايف نفسك تنين فى الـFacebook Ads .. يبقى اقفل الـArticle)

بس متنساش ان الـAds من اولها لاخرها كده هى مش اكتر من 10% بس من الـMarketing ككل !! و احنا كتبنالك الـArticle ده عشان نريحك و نصفيلك دماغك من الـ10% دول هنقولك خطوات عمل الـAd على الـfacebook من اوله لاخره

. يعنى فى اخر الـarticle دى هتبقى من الاخر بتعرف تعمل Ads على الـFacebook بس أخر ألاجا

قبل ما تعمل Ad روح للمكان الصح !!

خلينا قبل ما ندخل الشرح أوضحلك حاجة سريعه كده .. عشان تعمل Ad على

الـFacebook عندك مكانين

اول واحد هو Boost post :

و بتبقى تحت الـPost كده زى ما هو موضح قدامك .. اوعى تستسهل و تعمل

الـAd منها ، لانها ايوه اسرع .. لكن مش بتظهر لك كل الـOptions اللى ممكن تستخدمها ..

تانى طريقه و اللى بفضّلها هى :

من فوق ع اليمين زى ما فى الصوره >>

أبتدي ازاى بقى ؟؟

دلوقتي تعالى معانا وهنشرحلك الخطوات بالتفصيل (وبالصور وبالمستندات 😀 )

أنت أول ما بتدوس على Create Ads بيظهرلك اللى فى الصوره دلوقتى …

خلى بالك كل شويه عم Mark بيعدل و بيغير فى الـFacebook ads فالفكره انك تبقى فاهم مش حافظ .. و اللى هيكون واضح فى الصور دلوقتى هو شكل الـAds system من جوا فى بدايه 2015

المهم .. فى الجزئيه دى انت بتختار الـObjective بتاع الـAd بتاعك ….

الاختيارات اللى قدامك دي بتختلف على حسب نوع الـObjective بتاعك او هدفك من كل Ad انت بتعمله … بسرعة جداً وباختصار هشرحلك كل واحدة فيهم

1. لو هدفك الاساسى engagement الافضل تختار رقم واحد
2. لو الـPage بتاعتك لسه صغيرة ومحتاج تكسب Fans جديدة يبقى الافضل تستخدم الـOption ده
3. عندك Blog او Website وعاوز Traffic .. يبقى ده اختيارك المناسب
4. لو بتستخدم Landing page او عاوز Conversions مثلا كتسجيل بيانات او subscribe فده الاختيار الافضل.
5. لو عندك Application و هدفك الاساسى ان الناس تعملّه Download
6. من هنا بقى لو انت عاوز تزود الـ Engagement على حاجه متعلقة بالـApplication بتاعك.
7. الاختيار ده لو عامل Event و عاوزه يوصل لناس اكتر.
8. الاختيار ده للـOffers.
9. و اخر اختيار ده عشان تعمل Promotion لفيديو.

لما تصرف فلوس ، اصرفها على حاجة تستاهل !!

بعد ما اخترت الـObjective بتاع الـAd بتاعك بتختار الـpiece of content اللى هتعمل عليها اعلان …

و من هنا يا اما بتختار post قديم .. يا اما بتعمل واحد جديد من جوا الـAd نفسه بس قبل ما تختار تعمل Post Ad.. ايه الحاجة اللى تستاهل انك تصرف عليها دم قلبك ؟

أكيد الحاجه اللى بتعجب الـTargeted fans بتوعك (مش تعجب اى حد و خلاص) وتقدم value وتزود الـengagement … بس خد بالك من كام حاجه قبل ما تختار post او تكتب post جديد و تعمل عليه اعلان.

-لو عاوز تبيع .. متّبعش : كل ما قدمت Value اكتر فى الـpiece of content بتاعتك كل ما اقتناع اللى بيقراها بيك هيزيد، و كل ما هيبقى سهل يشترى منك الحاجه اللى انت بتقدمها .. طبعا ده بعد اتفاقنا ان محدش بيشترى حاجه هو مش عاوزها …أيّ قرار شراء بييجى لما يكون الشخص عنده رغبه يشترى أو محتاج الحاجه دى دلوقتى …

يعنى حاول و انت بتعمل Ads تعملها على Content بيفيد مش بيبيع بشكل direct !

طب إزاى أعمل Content إبن ناس عشان يجيب نتايج ؟؟ ممكن تقرا سريعاً القواعد الأربعون للـ content

حاسب لا الـFacebook يقفش عليك:

وانت بتعمل Facebook Ad ممكن يترفض من الـFB او ممكن يشتغل حبه صغيرين و بعدين يقف ..مش عشان النت مهنّج لا سمح الله اً… لكن عشان الـAd بتاعك مش عاجب الـfacebook أو مخالف لقوانينه (معلش يا سيدى هو الـFacebook بيحب يتدلع على زباينهُ شوية 😀 )

طب يعنى إيه مخالف ؟

فى الأول وفى الأخر الـFacebook يهمه إنه يحافظ على الـuser experience عنده .. عشان كده من حقه يضمن إن اللى بيعمل الاعلان يعملهُ بشكل أوستيك (شغل فنادق يعنى) خصوصا بقى إن فى منافسة عاليه بين المُعلنين نفسهم. فكان لازم ولابد إن الـFacebook يحط Rules للعبة الـAds عشان مش كل من هبّ ودبّ يدخل يعمل اعلان ويكرّه الناس فى الـFacebook

إيه الحاجات اللى ممكن تخليه مخالف؟

1 -لو الـAd فيه صورة عليها كلام أكتر من 20% .. كدة هيترفض .. وحَلّها انك تقيس صورتك

2- لو فى صوره الأعلان بتاعك نوع من انواع الـDrugs

3 – لو بتـOver promising (يعنى بتبيع كلام انت مش قده) بالبلدى متروحش تقولهم مثلا انك تخس 40 كليو فى شهر واحد، و لو مش مصدقنا جرب و قولنا حصل اية.

إتعب بقى شوية وإقرا الـFacebook Guidelines عشان تعرف تلعبها صح .

كدة احنا اخدنا الخطوة التانية .. شفت الموضوع سهل ازاى !!

هاTarget مين ؟؟

اول سؤال هسئلهولك هنا .. هو انت عارف الـBuyer Persona

لو عارف فا جبنالك هنا sheet ممكن تاخده زى ما هو تملاه دلوقتى عشان تقسّم الناس اللى هتعملّهم targeting ..

الـtargeting بقى من جوا الـFB تعالوا ناخد خطوة خطوة ونعرف هنعمل فيها إيه:

في الأول كدة أنت تقدر تختار الـaudience اللي هيوصلهم الـAd بالظبط بأنك تستخدم “create a custom audience ” هنا تقدر تدخل emails او حتى أرقام الـناس دي، و الـFacebook هيعملها matching.

خلى بالك البيانات دى مينفعش تبقى شاريها او واخدها من اى مكان . لازم تبقى واخدها من صحابها بـPermission منهم ولازم يكونوا عارفينك … و لو هما مش عارفينك على فكره الفيسبوك هيقفش ده 😀 بس مثلا لو كانت الـData دى واخدها من ناس عملوا Download ليك كان بيتكلم عن الـStrategy و بعدها كتبت piece of content عن الـstrategy الافضل هنا انك تعمل targeting للـناس اللى عملوا download للـe-Book ده لانهم غالبا هيبقوا مهتمين بأى حاجه متعلقه بالـTopic ده .

و لو مش معايا بيانات عن الـaudience، أعمل اية؟.. نبدأ نحدد مواصفات الـaudience و نختارها.

1- Location: يعني هتختار الناس اللي عايز تـTargetها موجوده في أنهي منطقة ؟؟

ممكن لو أختارنا مدينة نصر هيبقى عندك أختيارين، تختار مثلاً “Madinet El-Nasr” أو “Madinet El-Nasr +20″، هوضحلك الفرق..

الـ”+20″ الرقم دة معناه 20Km حوالين منطقة مدينة نصر و كل طبعا ما بتزود الـkm كل ما بتبعد عن المنطقة. أحنا مرة كنا عاملين target للناس اللي في مدينة نصر و أختارنا +20 جالنا audience من السيدة زينب و مكناش عايزينهم اصلاً :D.

2- Age: هنفترض إن أنت عندك Service هـتّهم الشباب .. ممكن نعمل السن مابين 18 الى 30 سنه، فكل منتج ليه السن المناسب، و ممكن يكون المنتج مناسب لكل الاعمار.

3- Gender: بتشوف المنتج بتاعك لأنهي نوع، مثلاً لو أنت بتبيع مكنة حلاقة، يبقى ممكن أختار الرجالة.

4- Language: هنا بتحدد أنت عايز تـTarget الناس اللي عندهم معرفة بـلُغات ايه. زي انك تبقى مثلا ممكن بـTarget الناس اللى في الهند اللى بيتكلموا عربى.

5- More Demographic: هنا لما بتكون عايز تعمل target للـaudience بطريقة specific جداً، أنت هتختار هو خاطب ولا متجوز، تعليمهُ مستواه ايه ، بيشتغل في أنهي مجال و هكذا..

6- Interests: هنا بتحدد الـaudience بتوعك أهتمامتهم ايه ، إذ كانوا بيهتموا بالرياضة، أو الأكل و الشرب، الخ..

7- Behaviors: هنا بتشوف هما نشاطتهم إية على النت، هل من الناس اللي بتحب تعمل search كثير ولا بيستخدموا الموبيل كثير، حضروا events معينة بيسافروا أماكن معينة او مهاجرين، الخ.

8- Connections: هنا هتختار أنت عايز الأعلان بتاعك يوصل للـFans اللي عندك على الـpage ؟؟ ولا كل الناس ؟؟ ولا تختار Fans بتوع page تانية خالص بس تكون انت admin عليها يعني 😀 .

في مشكلتين ممكن تقابلنا و أحنا بنحدد الـTarget Audience، منها:

• المشكلة الاولى ان الـaudience يكون جواه need بس الـinterest مش موجودة :- و انت مهمتك تُنكشها لحد ما يبقى متأكد من إنهُ عاوز الحاجه دى ، زى الـCareer Shifting مثلاً.

هبسطهالك ، لو انت فاتح شركة E- learning ، وفيه من الـTarget Audience بتوعك ناس حابة تعمل Career Shifting

(طبعا مفيش حاجة إسمها على الFacebook إنك Interest بالCareer Shifting) فـدى ببساطة تقدر تعمل أنت community خاصة بالموضوع وتخلق interest جديدة.

• المشكلة الثانيه أنك تكون بتـtarget ناس مش موجودة على النت :- فـ هنا هتعمل target للـsub-audience، نفترض أنك بتبع أجهزة منزلية و هنا عايز تعمل target للأمهات و دول مش موجودين كثير على النت، يبقى تعمل target لبناتهم مثلاً ;).

ما تجوم تطمن على فلوسك ؟!

اخر حاجة بتتعمل فى الـAd creation هى الـOptimization , ودى عبارة عن انى بختار طريقة معينة من الطرق اللى الـfacebook بيُنشر على اساسها الـ Ad بتاعى ” و هيحاسبنى بيها برضوا” , وكل طريقة الـ facebook بيحسبلها تسعيرة مختلفة، والمشكلة اللى بتقابل معظم الـsocial media marketers هى إزاى نختار بينهم.

طيب هى ايه الطرق دى اصلاً ؟:

• Optimize for Post Engagement
  

  

  
  

هنا الـ facebook بيركز انه يبعت الـAd بتاعى للناس اللى ممكن تعمل engagement، طب ايه مشكلة الطريقة دى؟

المشكلة بقى ان انا لما بعمل optimization على اساس الـ post engagement الـ Facebook بيبعت الـ Ad بتاعى للـ user اللى بيعمل like على اى حاجة (عشان يتأكد انه هيجيب engagement)، يعنى مش لازم يكون مهتم بيا انا بالذات، يعنى أسوأ segment من الـaudience بتاعى

طب أمتى اختار الطريقة دى؟!

لما اكون عارف ان الـAd بتاعى مش engageable، طب وانا ليه أعمل Ad مش engageable؟

ممكن لما الـclient يبقى عايز ينزّل حاجة معينة وانا عارف انها مش أد كده, ساعتها ممكن اختار الطريقة دي.

اللي جاي دة بقى update جديد عمله الـFacebook.

• Daily Unique Reach:
  

  

  
  

وده أجدد update اتعمل للـ optimization و بيخلى الـuser يشوف الــAd بتاعى مرة واحدة فى اليوم، طب ده هفيدنى فى أيه؟

هيفيدنى إن الـuser ميزهقش من الـad بتاعى، و ده ممكن يفيدنى لو أنا بعمل promotion لـproduct مهم أوى, ومش عايز الـuser يزهق منه، ده غير انه لو شافه كتير ممكن يختار “Hide” من الـnewsfeed وده هيضعف الـEdgeRank، بس طبعا فى الحالة دى الـImpression هيقل جداً عشان كده لازم الـtarget audience يبقى ultra specific

• (Impressions (CPM:

  

ودى اختصار cost per thousand impressions و ده معناه ان الـFB هيحاسبك لما الـad بتاعك يظهر لـ 1000 شخص ,يعنى الـ Facebook هيخلى أكبر عدد من الـusers يشوف الـAd بتاعى, وهنا ال Facebook بيحاسبنى على الـuser اللى بيشوفوا الـ Ad .. سواء جاب clicks أو مجابش :D.

• (Clicks (CPC:

  

• ودى اختصار Cost per click , وهنا الـFacebook بيبعت الـAd بتاعى للناس الاكثر قابلية انهم يعملوا click على ال ad بتاعى, وبيحاسبنى بالـclick، قطّاعى يعنى 😀 حتى لو داس لكن معملش أي نوع من أنواع الـEngagement 😀

طب أمتى اختار اعمل الـAd بتاعي CPC وأمتى CPM؟

على اعتبار ان فى 2 مننا, واحد مشاويره كتيره جدا, يعنى بيعمل فى اليوم 20 مشوار و واحد لو جالوا مشوار او اتنين فى اليوم يبقى كويس , الراجل اللى بيعمل مشاوير كتير المفروض يروح يركب تاكسي ولا يأجر عربية باليوم؟

لو جيت تفكر هتلاقى مادام بيعمل مشاوير كتير يبقى يأجر عربية باليوم هيبقى ارخصله, لأن التاكسى هيقف عليه غالى جدا, نفس الكلام اللى بيعمل مشوار واحد فى اليوم, يروح يأجر عربية كاملة فى اليوم, ولا ينزل يركب تاكسى؟ ينزل يركب تاكسى عشان تكاليف المشوار الواحد هتبقى أقل من تكاليف تأجير عربية, لكن تكاليف 20 مشوار هتبقى أكتر من تكاليف تأجير عربية فى يوم واحد

طب ايه هو الشخص اللى بيعمل مشاوير كتير وايه هو الشخص اللى بيعمل مشاوير قليلة؟

المشاوير هى الـclicks , يعنى المكان اللى لما يتحط فيه الـAd يجيب clicks كتير هو ده نفس حالة الراجل اللى عنده مشاوير كتير, فا لو انا عارف ان الـ newsfeed بالطبيعة الـclicks فيها كتير, الـ ( CTR (Click through rate فى الـ newsfeed بطبيعته عالى بيعدى 10 و20 % فبالتالى ده معناه ان كل 100 شخص هيظهرلهم هيدوس عليه 20 30 واحد

فلو انا عامل ال Ad بتاعى cpm وليكن هدفع دولار, الدولار ده هييجى فيه 20 click, 20 click ده يعتبر كتير لكل 1000 impression فى نفس الوقت اللى عامل ال ad بتاعه cpc هييروح يدفع تمن ال 20 click واحدة واحدة مش هيدفع دولار زي انا ما دفعت (هيتحاسب بالواحدة) كل واحدة هتقف عليه بحوالى 10 cent , هيلاقى نفسه دفع 2 دولار

مع ان نفس الـclicks دى كان ممكن ياخده بدولار واحد لو كان هو يبتحاسب cpm عشان هو عارف ان الـclicks فى الـnewsfeed كتير يبقى من المنطقى انى اتحاسب بالـimpression اللى هو ايجار عربية كاملة لكن العكس بقى فى الـ right column اللى هو الـ click قليلة جدا, يعنى لو كل 10000 impression جاب 5 10 clicks ممكن يبقى الموضوع ده rate average وده معناه ان مشاويرك قليلة يعنى الـclicks بتاعتك قليلة

مادام الـclicks قليلة وبتحتاج انك تظهر لناس كتير اوى عشان 5 بس هما اللى يدوسوا يبقى تاخد تاكسى تتحاسب بال (cpc) عشان تدفع تمن اللى يجيلك بس

عايز الـAd يظهر فين ؟

بعد ما بتحدد الـBudget بتظهرلك الخطوة الخامسة و هى انك بتختار الأعلان بتاعك يظهر فين، يا ترى عايز الإعلان يظهر فى الـDesktop اللى هو الشخص اللى بيفتح من PC او لاب ولا اللى معاه موبايل ولا انه يظهر على الجنب فى الـRight Colom او 2 او كلهم حتى على حسب ما أنت بتختار.

أخر حاجه ( لازم تدفع ) :

بعد ما تعمل content يستاهل وتحدد الـTarget Audienceبتوعك و تـOptmize الـAd بشكل كامل وتخلص كل الخطوات المهمه دي إلي إتكلمنا عليها فوق
هتيجي تـstart الـad ….. لازم قبلها الـfacebook يسألك هو أنت
هتدفع الإعلان إزاي؟؟

وفي أكتر من طريقه زي ما إنت شايف تقدر تدفع بيها الإعلان لو أنت معاك Internet card
ولو أنت مش معاك ؟؟
هات بطاقتك و 20 جنيه وروح لأقرب فرع لبنك CIB و أطلب
“Thomas Cook Card”، مش هتاخد منك وقت وتقدر بعدها تدفع الـbudget الـلي تناسبك …. وتـApprove الـAd بشكل طبيعي..بس كده.

Test قبل ما تلبس

في مفهوم أسمه AB Testing، و دة معناه إن قبل ما تعمل أي حاجة تجرب و تشوف أنهي أحسن طريقة تشتغل بيها لأن الـads كله تجربة!، و بعدين مينفعش تعمل ad بـ 500$، تستخدم method غلط و تبلس صاحب المحل، علشان تفهم ازاي تعمل AB Testing بص على الصورتين اللي تحت هنا

أحنا أختارنا الـtarget audience و أختارنا الأعلان بتاعنا يظهر على الـmobile news feed.

هنا سبت الـtarget audience زي ما هما مغيرتش أي حاجة فيهم و غيرت بس أن الـAd يظهر على الـDesktop News Feed.

يعني أنا عملت اية؟، انا سبت كل حاجة عملتها في الـAd زي الـTarget Audience والـOptmization Method. و غيرت بس الـAd Placement.

انت كده عملت A/B Testing علي Factor الـPlacement يعني المكان اللي هيظهر فيه الـAd اللي بالطبيعه هيتحكم في شكل ظهوره
طبعاً انت مطلوب منك تعمل A/b Testing علي اكتر من Factor عشلن تتأكد انك ماشي صح و من اهم الحاجات اللي محتاج تبتدي فيها Testing هي

1-الـInterests
اعمل اتنين Campaign ثبت فيهم كل العوامل من اول الLocation لحد الBidding و خلي الـInterest بس هو اللي مختلف و قارن نتايج ال2 و اوعدك انك هتنبهر من الفرق مع انك حاطت 2 Interest قريبين من بعض

2-Relationship Status

 

في بعض الحالات زي انك تكون بتبيع اثاث مثلاً بيبقي الموضوع فارق اوي انك تفصل اللي مخطوبين عن اللي متجوزين مثلاً, اللذيذ في الموضوع انك تقدر توصل لحد انك عامل Ad للي لسه مخطوبين من شهر و واحد تاني للي من تلات شهور و تشوف مين جايب نتايج احسان (طبعاً متنساش تثبت كل العوامل التانيه , يعني متقارنش المخطوبين اللي في مصر بالتجوزين اللي في سوريا )

طبعاً مش هما دول بس , انا عايز افهمك الConcept و انت طبّقه برحتك

Life Example

حبينا نجيبلكم مثال عام على نتايج الكلام ده بتكون خوزعبليه ازاي عشان تعرفوا احنا بنفكر لما نعمل Ads نعملها إزاى وعشان كده جبنالكم مثال من School Of Marketing نفسها.

الـScreenshot اللى قدامكم فيها post كنا عاملين لهُ Ad على الـFB ، احنا فى الـpost كان الTarget Audienceبتاعنا هما School Of Marketing Fans ،فى المثال ده الـPiece of content دى كانت engageable بالتالى المنطقى اننا نستخدم طريقة الـCPM “لان الـCTR بتاعها عالى .. يعنى عدد كبير من اللى بيشوفوا بيدوسوا على الـAd طبعا لو عملناها clicks هيتخرب بيتنا 😀 و هيحاسبنا على كل دوسه 😀

اما بقى لو عندنا حاجه الـCTR بتاعها كان قليل يعنى عدد قليل من اللى بيشوفوا بيدوسوا او بيعملوا اى نوع من انواع الـinteractions يبقى الافضل نعملها CPC مثلا عشان الـFB نفسه يجيبلنا Clicks .

ملحوظه :- عارفين ان الـPost ده الكلام في الصوره كان أكتر من 20% ومتسألوناش ازاي الـfb عداها 😀

نهايتو..

الـFB ads مهياش معضله ولا بعبع و عمايلها سهلة جداً . وانت كده سعادتك بقيت بتعرف تعمل FB Ads و لو نخربت شويه هتبقى بتعرف تعمل كل حاجه فى الـAds من اولها لاخرها …

بس خلى بالك كده من كام حاجه على السريع..

1- لما تعمل Ads حاول توجه الجزء الاكبر من الـbudget للـContent اللى بيعمل Engagement و اللى بيفيد مش اللى بيبيع

2- حاول دايما تركز على ان الـAds تروح للـFans بتوعك مش لناس برا , و بالطريقه دى انت هتوفر فلوسك اكتر و هيكون سعرها اقل
بس ده طبعا بعد ما تبني الCommunity بتاعك صح و ده هيحتاج منك شويه تعب في الاول

3- متخليش همك فى عدد الـFans خالص و اهتم اكتر بالـEngagement و ممكن تعرف ليه من هنا اقولك يعنى ايه Like و متزعلش

4- اوعى تبطل تعمل Testing حتى لو ضاع منك شويه فلوس هى كده كده هتعلمك و هتوصلك لنتايج محدش وصلها قبلك فى الـIndustry اللى بتعملها Marketing

5- العلم اسمه Social media marketing مش Social media ads و بالتالى اوعى تدى للـAds اكبر من حجمها لأنها جزء مش الكل 😉

لو عندك أى اسئله متعلقه بالـFB Ads اسال و احنا هنجاوبك و لو بتعمل Ads فعلا و عاوز تتاكد انت شغال صح او فى مشكله معينه بتواجهك فيها فاحنا عاملين Free Consultation لاول 20 واحد موافي للشروط هيسجل معانا من هنا :
ملحوظه : هتعرف معني موافي للشروط لما تدوس